- كل ما تريد معرفته عن الجلوتامين, ولماذا اصبح من اشهر المكملات الغذائية ..
- الدور الهام الذي يلعبه الجلوتامين في هيكلة العضلات ...
- عن الدراسات التي تشرح دور الجلوتامين في مكافحة عملية هدم العضلات ...
- كيف يعتمد الجهاز المناعي على الجلوتامين كمصدر أول للطاقة
- متى افضل الأوقات لأخذ الجلوتامين
- المنافع الاساسية العائدة على لاعب كمال الاجسام من استخدام الجلوتامين ...
نظرة عامة على الجلوتامين :
الجلوتامين معروف في عالم
كمال الاجسام في انحاء العالم انه من افضل المكملات الغذائية اللي ممكن
تشتريها من السوق . والجلوتامين هو احد الأمينو اسيد الغير اساسية وكلمة
الغير اساسية لا تعني انه غير ضروري ولكن تعني ان جسم الانسان ينتجه بصورة
طبيعيه .. 60% من احتياجنا للجلوتامين موجودة في العضلات المتصلة بالعظام
مع الأخذ في الاعتبار الموجودة في الرئة او الكبد والمعدة
الجلوتامين ذات هيكل جزيئي فريد حيث انه يتكون من سلسلة ثنائية
النايتروجين, وده سبب رئيسي في جعل الجلوتامين هو الموصل الأول للنايتروجين
في خلايا العضلات ....
في السنين القليلة الماضية
الجلوتامين اكتسب اهمية كبيرة جدا في الابحاث التي تشرح مساهمته الفريدة في
عملية بناء العضلات وتصنيع البروتين وعملية مكافحة لهدم العضلات وتكسير
الخلايا العضلية وايضا رفع معدلات هرمون النمو . وعشان الاسباب دي
الجلوتامين بيلعب دور هام في جسم الانسان بمساعدته في استشفاء خلايا
العضلات وفي الظروف الطبيعية ( الغير ممارس للرياضة ) جسم الانسان قادر على
انتاج كمية جلوتامين اكبر مما يحتاجه الجسم وفي حالات تانية جسم الانسان
بيحتاج كميات جلوتامين اكبر من اللي الجسم يقدر ينتجها وده بيسمي نضوب
الجلوتامين .وحالة نضوب الجلوتامين دي ممكن تيجي نتيجة لمرض زي البرد
العادي اللي بيصيب اي حد في الشتاء العمليات الجراحية والحروق اللي من
الدرجات العالية .والحالة اللي احنا لينا علاقة بيها اصلا المتسببة في نضوب
الجلوتامين او نفاذه هي التمرين الجسدي العالي الحدة .
ما هي وظيفة الجلوتامين ؟
سؤال مهم بعد الهري والهذيان اللي فوق ده :)
زي
ما قولت في اخر سطرين في حالات المرض او التمرين الجسدي العالي الحدة
المطلوب من الجلوتامين بيكون اقل من اللي الجسم بينتجه لان الخلايا في
الجهاز المناعي بتكون محتاجة الجلوتامين كمصدر اول للطاقة . لما بتصاب بمرض
او جرح جهاز المناعة بتاعك بيحس وعليه الجسم بينتج جلوتامين اكتر من
المطلوب . وعشان كده الناس اللي هم دايما عرضة للمرض او في اماكن المرض
فيها منتشر بيكونوا محتاجين اكتر للجلوتامين ومكملاته عشان يقدروا يقاوموا
ويدعموا جهاز المناعة الخاص بيهم ...
والمهم لينا ان مكملات الجلوتامين بيتدعم أوي عملية حبس او احتجاز
النايتروجين وتمنع خسارة بروتين العضلات .في الدقايق الأولى من التمرين
بتاعك العضلات بتبدأ تخرج الجلوتامين لحد لما معدلات الجلوتامين توصل
لمستويات منخفضة أوي بيبدأ الجسم يدخل في حالة الكاتابوليك او الهدم العضلي
وتكسير خلايا العضلات. في حالات قصوى ممكن العملية دي توصل لخسارة المكتسب
العضلي, والجلوتامين هو المسئول الأول عن نقل النايتروجين داخل الجسم في
خلال التمرين الجسدي العالي الحدة او النشاط العالي للجسم . عشان كده
التوازن الايجابي للنايتروجين وكمية الجلوتامين العالية في الجسم يعتبروا
شيء ضروري في عملية بناء العضلات ..
لماذا يحتاج الجسم الى الجلوتامين :
جسم الانسان بيستخدم الجلوتامين عشان ينقل الأمونيا والنايتروجين داخل
الجسم عبر مجرى الدم . عشان كده تلاقي دايما الجسم بيحاول يحافظ على مستوى
الجلوتامين ثابتة في مجرى الدم في كل الأوقات. جهاز المناعة والجهاز الهضمي
بيكونوا في حاجة دائمة للجلوتامين احنا شرحنا موضوع الجهاز المناعي
والجلوتامين اما بالنبسة للجهاز الهضمي فهو بيحتاج الجلوتامين عشان يقدر
يواجه القدر الزايد في البروتين في النظام الغذائي للاعبي كمال الاجسام في
فترة الكت .
زي ما قولت ان العضلات هي اكبر مخازن للجلوتامين في الجسم, 60% من نسبة
الجلوتامين في جسمك بيتكون موجودة ومتخزنة داخل العضلات, لما الشخص بيدخل
جسمه في نشاط عالي او يبدأ يتمرن حديد مثلا بيكون الجسم محتاج جلوتامين
اعلى من الموجود ولو الجسم ما قدرش انه يحصل على الكمية المطلوبة من مجرى
الدم هيتحول على الكمية المختزنة في العضلات وبالطريقة دي الجسم هيبدأ يكسر
من المختزن في العضلة ويرسله الى مجرى الدم عشان يعادل الكمية المطلوبة في
الحالات اللي زي دي بيكون مكملات الجلوتامين مطلوبة ..
مكملات الجلوتامين بتكون هامة جدا جدا بعد فترة تمرين شاقة, لان كمية
الجلوتامين الموجود في الجسم ممكن تنخفض بنسبة 50% عن الموجود قبل التمرين
لما الخلايا العضلية بتتكسر خلال التمرين الجلوتامين بيكون مطلوب بعد
التمرين عشان يوصل البروتين للخلايا العضلية ويحافظ على تخزينها واللي
بيأدي بدوره الى زيادة المكتسب العضلي .. عند اجبار الجسم على انتاج كمية
الجلوتامين المطلوبة ( في حالة عدم استخدام اي مكمل جلوتاميني ) ممكن عملية
انتاج الكمية المطلوبة دي تاخد عدة ساعات او احيانا بتوصل لعدة ايام لرجوع
معدل الجلوتامين للطبيعي مرة تانية ..
متى افضل الأوقات لاستخدام الجلوتامين :
ببساطة
شديدة الجلوتامين بيكون مطلوب لما كمية البروتين الموجودة داخل جسم
الانسان تكون منخفضة عن المعدل الطبيعي والجسم في حاجة اليه, والكمية في
الجسم الانسان بتكون في اشد حالات الانخفاض والجسم بيكون في اشد احتياجه
للجلوتامين بعد التمرين الشاق او النشاط الهائل وعشان كده المفروض تاخد
الجلوتامين في اقرب وقت بعد التمرين على طول . وللسبب ده كتير اوي من لاعبي
كمال الاجسام بيفضل ياخد الجلوتامين بعد التمرين على طول مع شيك البروتين
الخاص بيه والجلوتامين مالهوش اي طعم في الشيك يعني مش هيأثر على طعم
البروتين ...
أهمية الجلوتامين للاعبي كمال الأجسام :
- هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 640x427 .
- الجلوتامين ممكن يحسن ويعلي آدائك ويساعدك في بناء العضلات واعادة بناءها بعد التمرين
- هقول اهميته كده في عدة نقط عشان ما اطولش الموضوع :
- بيحفز على البناء العضلي عن طريق نقل النايتروجين الى الخلايا العضلية لبناء البروتين .
- بيقلل الفترة اللي بيحتاج الجسم عشان الاستشفاء العضلي .
- بيحفز افراز هرمون النمو .
- بيقلل الهدم العضلي اثناء التمرين الشاق والنشاط العضلي .
- بيزود المقاومة عن طريق تجديد مخازن الجلايكوجين في حالات نضوب الجلايكوجين
- بيقلل فرص الاصابة بالأمراض و العدوى عن طريقة تقوية جهاز المناعة ( وده مهم للاعب كمال الاجسام في الشتاء )
- بيمنع الأوفر ترينينج اللي بيحصل من التمرين العالي والشاق لفترات طويلة
عشان
تقدر تحصل على النتايج دي من استخدام الجلوتامين لازم يكون الجلوتامين
اللي داخل جسمك اكبر من الكمية اللي جسمك محتاجها , وكمية الجلوتامين اللي
الجسم بيحتاجها دي بتعتمد على المجهود المبذول اثناء التمرين العضلي .
هل للجلوتامين اي آثار جانبية :
بيؤدي للوفاة في بعض الحالات
بهزر طبعا :)
الجلوتامين ليس له أي اثار جانبية للبالغين وتحت الحد المسموح بيه .
هي دي بس فائدة الجلوتامين ؟؟؟
زي ما قولنا في الموضوع ان الجلوتامين هو مصدر اول للطاقة للجهاز المناعي
ومصدر ثانوي للجهاز الهضمي وده اكيد هيضيف فوائد اكتر للجلوتامين زي مثلا :
- جهاز مناعي أقوى وبالتالي فرصة اقل للتعرض للاصابة بالأمراض .
- مواجهة بعض الاضرار المعوية التي تنتج عن استخدام بعض مضادات الالتهابات
- بيعلي المود, يعني بيحسن المزاج
- له أثر ايجابي في بعض حالات الامراض العصبية
- بيساعد في تحسين الذاكرة القريبة والبعيدة المدى ...
ممكن اي حد يستخدم الجلوتامين ؟
الابحاث بتقول ان الناس المصابة بداء السكر لابد ان يتوخى الحذر ( يتوخى أه مالك ؟ هتمثل ؟
) عند استخدام المكملات المحتوية على الجلوتامين لان العملية التمثيل
الغذائي للجلوتامين لديهم تتم بصورة غير طبيعية . والمفروض مراجعة الدكتور
قبل استخدامه للمنتج ...
